
遍知贝玛嘎波大师教言集PK57ཐུབ་པའི་དབང་པོའི་བསྟོད་པ་བཞུགས་སོ།།
9-473
༄༅། །ཐུབ་པའི་དབང་པོའི་བསྟོད་པ་བཞུགས་སོ།།
༄༅། །ཐུབ་པའི་དབང་པོའི་བསྟོད་པ་བཞུགས་སོ།། བཅོམ་ལྡན་ལྷ་ཡི་ལྷ་ཤཱཀྱའི་རྒྱལ་པོ་དེ་ལ་ཕྱག་འཚལ་ལོ། །ཕུན་ཚོགས་གསེར་གྱི་རི་བོའི་མདངས་གསལ་ཞིང་། །ཉིན་བྱེད་འབུམ་ལྟར་མཚན་དཔེའི་དཔལ་འབར་བ། །འཇིག་རྟེན་ཕྱག་འོས་ཀུན་གྱིས་ལེགས་མཆོད་པའི། །སྐྱབས་ཀྱི་དམ་པ་ཁྱོད་ལགས་ཟས་གཙང་སྲས། །སངས་རྒྱས་རྣམས་ལ་ངོ་བོ་ཉིད་སྐུ་དང་། །དག་པའི་སྲས་ལ་ལོངས་སྤྱོད་རྫོགས་པ་དང་། །
9-474
མ་དག་འགྲོ་བའི་སྣང་ངོར་སྤྲུལ་པའི་གཟུགས། །ཅིར་ཡང་སྟོན་པ་ཁྱོད་ལགས་ཟས་གཙང་སྲས། །གང་གིས་ཆོས་ནི་འགའ་ཡང་མ་བསྟན་ཀྱང་། །ཉན་ཐོས་རང་སངས་རྒྱས་དང་ཐེག་ཆེན་པའི། །རང་རང་སྐལ་པ་
ཇི་བཞིན་བསྟན་ཐོས་ནས། །རྣམ་གྲོལ་མཛད་པ་ཁྱོད་ལགས་ཟས་གཙང་སྲས། །ཐུབ་པའི་སྣང་བྱེད་གཞན་གྱིས་རབ་སྤངས་པའི། །སྙིགས་དུས་མཚན་མོར་འཁྱམས་པའི་འགྲོ་བ་ལ། །མ་རྨད་ཐུགས་རྗེའི་འོད་བརྒྱའི་དཔལ་ཡོན་
གྱིས། །དབུགས་དབྱུང་མཛད་པ་ཁྱོད་ལགས་ཟས་གཙང་སྲས། །མཁའ་དང་མཉམ་པའི་མ་གྱུར་འགྲོ་བ་རྣམས། །མི་བཟད་སྲིད་པའི་འཇིགས་པ་ལས་སྐྱོབ་པའི། །མགོན་སྐྱབས་དཔུང་གཉེན་གཞན་ན་མ་མཆིས་པས། །སྐྱབས་གནས་རེ་
ས་ཁྱོད་ལགས་ཟས་གཙང་སྲས། །བྱམས་པས་དྲན་ཞིང་སྙིང་རྗེས་བརླན་པའི་ཡིད། །རྟག་ཏུ་གཞན་དོན་འབའ་ཞིག་སྒྲུབ་སྒྲུབ་པའི། །སྲིད་པ་གསུམ་ན་གྲགས་པའི་བ་དན་ཅན། །བདག་གི་སྟོན་པ་ཁྱོད་ལགས་ཟས་
གཙང་སྲས། །མཐོང་དང་ཐོས་དང་དྲན་པ་ཙམ་ཉིད་ཀྱིས། །བདུད་དང་ཕས་ཀྱི་རྒོལ་བ་ལས་རྒྱལ་ཞིང་། །མེ་དང་གཅན་གཟན་ཆུ་ཡི་འཇིགས་པ་རྣམས། །འཕྲོག་པར་མཛད་པ་ཁྱོད་ལགས་ཟས་གཙང་སྲས། །བུ་འདོད་
པ་ལ་བུ་དང་སློང་བ་ལ། །ནོར་དང་རྒྱལ་སྲིད་འདོད་ལ་རྒྱལ་པོ་དང། །ཚེ་འདོད་རྣམས་ལ་འཆི་མེད་མཆོག་སྩོལ་བའི། །ཡི་བཞིན་ནོར་བུ་ཁྱེད་ལགས་ཟས་གཙང་སྲས། །ཐར་འདོད་རྣམས་ལ་དགེ་བའི་བཤེས་གཉེན་དང་། །
9-475
བྱང་ཆུབ་སྒྲུབ་པའི་ཐབས་དང་ལམ་བགྲོད་པའི། །ཡོན་ཏན་དཔག་ཡས་མ་ཚང་མེད་སྟེར་བའི། །དཔག་བསམ་འཁྲི་ཤིང་ཁྱོད་ལགས་ཟས་གཙང་སྲས། །ཚོགས་གཉིས་ཆུ་གཏེར་བསྲུབས་པ་ལས་ཐོན་པའི། །སྐུ་གཉིས་བདུད་རྩི་
སྨན་གྱིས་འཁོར་བ་པའི། །གཅོང་ནད་མ་ལུས་རྩད་ནས་འབྱིན་མཛད་པའི། །སྨན་པའི་རྒྱལ་པོ་ཁྱོད་ལགས་ཟས་གཙང་སྲས། །གུས་པས་འདུད་དོ་བཀའ་དྲིན་ཡིད་ལ་བརྣངས། །དད་པས་སྐྱབས་སོ་རྫོགས་སངས་ཐུགས་རྗེ་
ཅན། །གསོལ་བ་འདེབས་སོ་བརྩེ་བའི་ཕྱག་གིས་གཟུང་། །རྟག་པར་དྲན་ནོ་སྙིང་གི་མུན་པ་སོལ། །དེ་སྐད་རྒྱལ་བའི་བསྟི་གནས་བེའུ་རར། །རང་བྱུང་ཐུབ་པའི་སྣང་བརྙན་དེ་དྲུང་དུ། །དད་པས་ཡིད་བསྐུལ་
བསྟོད་པ་འདི་བརྗོད་པས། །འདོད་པའི་དོན་ཀུན་ཡིད་བཞིན་འགྲུབ་པར་ངེས། །འདི་ནི་ས་ཡི་བརྒྱ་བྱིན་མཚོ་སྐྱེས་ཞབས། །དང་བས་མཆོད་པའི་བཙུན་མོ་དོན་གཉིས་འགྲུབ། །གང་གི་ངོར་ནི་པདྨ་དཀར་པོ་ཞེས། །
རྣམ་དཔྱོད་དྲི་བསུང་རྒྱས་པ་དེ་ཡིས་སོ།། །།ཤུ་བྷམ།། །།

